අධිකරණ නියෝගයකට අනුකූලව, තමන් විසින් අවභාවිත කරන ලද රජයේ වාහනයේ ඡායාරූපයක් ද සහිතව පුවත්පතක ප්‍රසිද්ධ දැන්වීමක් පළ කරමින් ශ්‍රී ලංකා ප්‍රජාතාන්ත්‍රික සමාජවාදී ජනරජයේ මහජනතාවගෙන් අවංකව සමාව ඉල්ලා සිටීමට හිටපු අමාත්‍ය එච්.එම්. ෆවුසි මහතා කටයුතු කර තිබේ.
ශ්‍රේෂ්ඨාධිකරණයේ විභාග වූ අංක SC/FR 275/2024 දරන නඩුකරයේදී ලබා දුන් තීන්දුවට අනුව මෙම නිවේදනය පළ කර ඇත.
අදාළ ප්‍රසිද්ධ දැන්වීමේ සඳහන් කර ඇත්තේ, ආපදා කළමනාකරණ මධ්‍යස්ථානය වෙත පවරා තිබූ WP KI-4666 දරන ටොයෝටා ලෑන්ඩ් කෲසර් රථය සිය පෞද්ගලික ප්‍රයෝජනය සඳහා අවභාවිත කිරීම සම්බන්ධයෙන් ශ්‍රී ලංකා ප්‍රජාතාන්ත්‍රික සමාජවාදී ජනරජයේ මහජනතාව වෙත තමන්ගේ අවංක සහ ඉතා සිතාමතින් යුතු සමාව ඉල්ලා සිටින බවයි.
