හිටපු මහ බැංකු අධිපති අජිත් නිවාඩ් කබ්රාල්ට එරෙහිව පවරා ඇති නඩුවේ පැමිණිල්ලේ සාක්ෂි විභාගයෙන් අනතුරුව, විත්තියේ සාක්ෂි කැඳවීමට කොළඹ විශේෂ ත්‍රිපුද්ගල මහාධිකරණය ඊයේ (26දා) නියෝග කළේය.
ඒ අනුව හිටපු මහ බැංකු අධිපතිවරයා සාක්ෂි කූඩුවේ සිට සාක්ෂි දීම ආරම්භ කළේය. මෙම නඩුව මනෝජ් තල්ගොඩපිටිය (සභාපති), උදේශ් රණතුංග සහ බුද්ධික සී. රාගල යන මහත්වරුන්ගෙන් සමන්විත විශේෂ ත්‍රිපුද්ගල මහාධිකරණ විනිසුරු මඬුල්ල ඉදිරියේ විභාගයට ගැනිණි.
2011 වසරේ මාර්තු මස 11 වැනිදා සහ 2012 වසරේ නොවැම්බර් මස 19 වැනිදා අතර කාලසීමාව තුළ ග්‍රීසියේ ආර්ථිකය බිඳවැටී තිබියදී, දැඩි මූල්‍ය අවදානමක් සහිත ග්‍රීක බැඳුම්කරවල රජයේ මුදල් ආයෝජනය කිරීම මඟින් රුපියල් 1,843,267,595.60ක (රුපියල් කෝටි 184කට අධික) පාඩුවක් රජයට සිදු කිරීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් හිටපු මහ බැංකු අධිපතිවරයාට එරෙහිව මෙම නඩුව පවරා තිබේ.
පැමිණිල්ලේ සාක්ෂි විමසීම අවසන් කිරීමෙන් අනතුරුව, විත්තිකරුට එරෙහිව එල්ල කර ඇති චෝදනා සාධාරණ සැකයකින් තොරව සනාථ කිරීමට තරම් ප්‍රමාණවත් සාක්ෂි ඉදිරිපත් කිරීමට පැමිණිල්ල අපොහොසත් වී ඇති බවට විත්තිය වෙනුවෙන් මූලික විරෝධතාවක් මතු කෙරිණි. ඒ අනුව, අපරාධ නඩු විධාන සංග්‍රහ පනතේ 200 වැනි වගන්තිය ප්‍රකාරව විත්තියේ සාක්ෂි කැඳවීමකින් තොරව විත්තිකරු නිදහස් කරන ලෙස අධිකරණයෙන් ඉල්ලීමක් කරන ලදි.
එම ඉල්ලීම සම්බන්ධයෙන් දෙපාර්ශ්වයේම කරුණු දැක්වීම් සලකා බැලූ ත්‍රිපුද්ගල මහාධිකරණ විනිසුරු මඬුල්ල, විත්තිකරුට එරෙහිව නඩුව ඉදිරියට පවත්වාගෙන යාමට තරම් ප්‍රමාණවත් සාක්ෂි පැමිණිල්ල විසින් ඉදිරිපත් කර ඇති බවට තීරණය කරමින් අදාළ ඉල්ලීම ප්‍රතික්ෂේප කළේය.
ඒ අනුව විත්තියේ සාක්ෂි විභාගය පැවැත්විය යුතු බවට නියෝග කළේය.
විත්තියේ නඩුව විමසීමට තීරණය කිරීමෙන් අනතුරුව අපරාධ නඩු විධාන සංග්‍රහයේ 201 වැනි වගන්තිය යටතේ විත්තිකරුට නීතියෙන් හිමිවන අයිතිවාසිකම් සහ විකල්ප පිළිබඳව අධිකරණය විසින් විත්තිකරු දැනුවත් කරන ලදි. ඒ අනුව, සාක්ෂි කූඩුවට නැඟ දිවුරුම් දී හරස් ප්‍රශ්නවලට යටත්ව සාක්ෂි ලබා දීමට, නැතහොත් දිවුරුම් දීමකින් හෝ හරස් ප්‍රශ්නවලට යටත් වීමකින් තොරව විත්ති කූඩුවේ සිට ප්‍රකාශයක් පමණක් සිදු කිරීමට, එසේත් නොමැති නම් විත්තිය වෙනුවෙන් වෙනත් සාක්ෂිකරුවන් කැඳවා සාක්ෂි මෙහෙයවීමට විත්තිකරුට අවස්ථාව හිමිවන බව අධිකරණය පෙන්වා දුන්නේය.
අධිකරණය හමුවේ ඇති එම විකල්ප අතරින් සාක්ෂි කූඩුවේ සිට සාක්ෂි දීමට විත්තිකාර අජිත් නිවාඩ් කබ්රාල් තීරණය කළේය.
ඒ අනුව ඔහු සාක්ෂි කූඩුවට නැඟ සාක්ෂි ලබා දුන්නේය. එහිදී එකල පැවති දේශීය හා ජාත්‍යන්තර ආර්ථික තත්ත්වය මෙන්ම, අධික අවදානමක් පැවතියද ග්‍රීක බැඳුම්කරවල මුදල් ආයෝජනය කිරීමට තීරණය කළ පසුබිම සහ ඒ සඳහා බලපෑ හේතු සාධක විස්තරාත්මකව අධිකරණය හමුවේ කරුණු දක්වමින් හෙළිදරවු කරන ලදි.
මෙම නඩුවේ පැමිණිල්ල වෙනුවෙන් අල්ලස් හෝ දූෂණ චෝදනා විමර්ශන කොමිෂන් සභාවේ සහකාර අධ්‍යක්ෂ (නීති) අනූෂා සම්බන්දප්පෙරුම මහත්මිය සමඟ කමණි ද සිල්වා සහ ගජලක්ෂ්මි සිවසුබ්‍රමනියම් යන මහත්මීහු පෙනී සිටිමින් පැමිණිල්ල මෙහෙයවූහ.