සිංගප්පූරුව තුළ පවතින ශ්‍රම හිඟයට පිළියමක් ලෙස, ශ්‍රී ලාංකිකයන් ඇතුළු විදේශීය ශ්‍රමිකයන් සේවයට බඳවා ගැනීමට හැකි වන පරිදි එරට වැඩ බලපත්‍ර (Work Permit) ක්‍රමවේදයේ නො-සම්ප්‍රදායික මූලාශ්‍ර රැකියා ලැයිස්තුව (NTS Occupation List) යාවත්කාලීන කරමින් නව රැකියා ක්ෂේත්‍ර 8 ක් එකතු කර තිබේ.
මෙම පියවර මගින් ආහාර සේවා (Food Services), සමාජ සේවා (Social Services) සහ ගුවන් ගමන් ක්ෂේත්‍රය (Aviation) යන අංශවල පවතින පුරප්පාඩු සඳහා විදේශීය ශ්‍රමිකයින් යෙදවීමට සිංගප්පූරු රැකියා යෝජකයින්ට අවස්ථාව හිමිවේ.
අලුතින් එක් කළ රැකියා ක්ෂේත්‍ර 8:
- මස් හා මාළු කපන්නන් සහ ඒ ආශ්‍රිත ආහාර පිළියෙල කරන්නන් (Butchers, fishmongers & food preparers)
- ආහාර සහ පාන වෙළඳසැල් සහයකයින් (Food & drink stall assistants)
- මුළුතැන්ගෙයි සහයකයින් (Kitchen assistants)
- සේවකයින් / වේටර්වරුන් (Waiters)
- ගුවන් සේවකයින් (Cabin attendants)
- ළදරු බලාගන්නන් සහ කුඩා ළමා සංරක්ෂකයින් (Babysitters & infant caregivers)
- පූර්ව ළමාවිය අධ්‍යාපන සහයකයින් (Educarers)
- ගුරු සහයකයින් (Teacher aides)
සුදුසුකම් ලබන රටවල්:
මෙම ක්‍රමවේදය යටතේ ශ්‍රී ලංකාව ඇතුළුව රටවල් 9 ක පුරවැසියන්ට රැකියා සඳහා ඉල්ලුම් කළ හැකිය.
- ශ්‍රී ලංකාව, ඉන්දියාව, බංග්ලාදේශය, භූතානය, කාම්බෝජය, ලාඕසය, මියන්මාරය, පිලිපීනය සහ තායිලන්තය.
ප්‍රධාන නීති සහ කොන්දේසි:
- අවම මාසික වේතනය: මෙම NTS ලැයිස්තුව යටතේ විදේශීය ශ්‍රමිකයෙකු බඳවා ගන්නා රැකියා යෝජකයෙකු විසින් අවම වශයෙන් සිංගප්පූරු ඩොලර් 2,000 ක ($2,000) ස්ථාවර මාසික වේතනයක් ගෙවිය යුතුය.
- ආයතනික සීමාවන් (Quota): ආයතනයක සමස්ත සේවක සංඛ්‍යාවෙන් NTS රැකියා බලපත්‍ර හිමියන්ගේ ප්‍රතිශතය 8% නොඉක්මවිය යුතුය.
- රැකියා සහතිකය: මෙම ලිහිල් කිරීම සිදුකළ ද, ස්වයංක්‍රීයව Work Permit අනුමැතිය හිමි නොවන අතර සිංගප්පූරුවේ රැකියා යෝජකයා අදාළ නියාමන කොන්දේසි සපයා තිබීම අනිවාර්ය වේ.