ශ්‍රී ලංකාවේ නව විෂය මාලා ප්‍රතිසංස්කරණවල කොටසක් ලෙස, ව්‍යවසායකත්වය හා මූල්‍ය සාක්ෂරතාව ආවරණය කරන නව විෂයයක් 2027 වර්ෂයේ සිට 6 ශ්‍රේණියේ සිසුන් සඳහා හඳුන්වාදීමට නියමිත බව අග්‍රාමාත්‍ය ආචාර්ය හරිණී අමරසූරිය මහත්මිය ප්‍රකාශ කර තිබේ.
6 ශ්‍රේණියේ සිට 9 ශ්‍රේණිය දක්වා සිසුන්ට ව්‍යවසායකත්වය හා මූල්‍ය සාක්ෂරතාව පිළිබඳ දැනුම ලබාදීම අරමුණු කරගනිමින් පුළුල් විෂය මාලා ප්‍රතිසංස්කරණයක් සකස් කර ඇති බව අග්‍රාමාත්‍යවරිය සඳහන් කළාය.
මූල්‍ය සාක්ෂරතාව ප්‍රවර්ධනය සඳහා පැවති සීනු නාද කිරීමේ උත්සවයකට එක්වෙමින් ඇය සඳහන් කළේ, මෙම වැඩසටහනේ පළමු අදියර ලෙස 2027 වර්ෂයේදී සියලුම 6 ශ්‍රේණියේ සිසුන් සඳහා නව විෂයය හඳුන්වාදෙන බවයි.
පාසල් දරුවන්ට හා තරුණ තරුණියන්ට කුඩා වියේ සිටම ව්‍යවසායකත්වය හා ආයෝජන පිළිබඳ ප්‍රායෝගික අත්දැකීමක් ලබාදීම අරමුණු කරගත් කොටස් වෙළෙඳපොළ ක්‍රීඩාව සහ පාසල් ප්‍රාග්ධන වෙළෙඳපොළ සමාජ වැනි වැඩසටහන් පිළිබඳව ද අග්‍රාමාත්‍යවරිය එහිදී අවධානය යොමු කළාය.
මූල්‍ය සාක්ෂරතා අධ්‍යාපනය තුළ ආචාරධර්ම හා වගකීමෙන් යුතු මූල්‍ය හැසිරීම් පිළිබඳව ද දැඩි අවධානයක් යොමු විය යුතු බව ඇය අවධාරණය කළාය. මුදල් උපයා ගැනීම අනෙක් අයව සූරාකෑමක් හෝ රැවටීමක් සම්බන්ධ විය නොහැකි බවත්, ඒ වෙනුවට වගකීමෙන් හා ආචාරශීලීව කටයුතු කිරීමේ වැදගත්කම තරුණ පිරිසට ඉගැන්විය යුතු බවත් අග්‍රාමාත්‍ය හරිණී අමරසූරිය මහත්මිය වැඩිදුරටත් අවධාරණය කළාය.