ශ්‍රී ලංකා ගුවන් හමුදාවේ ඍජු දායකත්වය යටතේ නවීකරණය කරන ලද මාලබේ පිහිටි ‘වෛද්‍ය නෙවිල් ප්‍රනාන්දු අනුස්මරණ ගුවන් හමුදා රෝහල’ සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතාගේ ප්‍රධානත්වයෙන් ඊයේ (09) නිල වශයෙන් විවෘත කෙරිණි.
ගුවන් හමුදාපති එයාර් මාර්ෂල් බන්දු එදිරිසිංහ මහතාගේ ආරාධනයකට අනුව ඇමැතිවරයා මේ අවස්ථාවට එක් විය.
භාවිතයට නොගන්නා සහ ඌන-උපයෝජිත රාජ්‍ය දේපළ ජනතා යහපත උදෙසා ප්‍රශස්ත ලෙස යොදාගැනීමේ රජයේ වැඩපිළිවෙළට මේ පියවර විශිෂ්ට ආදර්ශයක් බව ඇමැතිවරයා එහිදී අවධාරණය කළේය.
ජනාධිපති සහ ආරක්ෂක ඇමැති අනුර කුමාර දිසානායක මහතා සහ සෞඛ්‍ය හා ජනමාධ්‍ය ඇමැතිවරයා විසින් ඉදිරිපත් කරන ලද ඒකාබද්ධ කැබිනට් යෝජනාවකට අනුමැතිය හිමිවීමෙන් පසු මේ නව වැඩපිළිවෙළ ක්‍රියාත්මක වේ. ඒ අනුව 2017 වසරේ සිදු වූ පවරා ගැනීමෙන් පසු වසර අටක් තිස්සේ පැවැති තාවකාලික පාලන ක්‍රමය වෙනුවට, නව දෙමුහුන් (Hybrid) මෙහෙයුම් රාමුවක් යටතේ රෝහලේ අයිතිය මහා භාණ්ඩාගාරයට 100%ක් හිමි සමාගමක් යටතට පවරා, එහි දෛනික මෙහෙයුම් වගකීම ශ්‍රී ලංකා ගුවන් හමුදාව වෙත පවරා දී ඇත.
ගුවන් හමුදාවේ විශේෂඥතාව, වෘත්තීය ප්‍රමිතීන් සහ කාර්යක්ෂම පරිපාලනය යොදාගනිමින් ගුවන් හමුදා සාමාජිකයන්ට සහ ඔවුන්ගේ පවුල්වල සමීපතමයන්ට මෙන්ම සමස්ත මහජනතාවටද උසස් සෞඛ්‍ය සේවාවක් ලබාදීම මින් අපේක්ෂා කෙරේ. මෙහි මෙහෙයුම් කටයුතු ප්‍රධාන විධායක නිලධාරි එයාර් කොමදෝරු නිලුකා අබේසේකර මහත්මියගේ නව පරිපාලනය යටතේ ක්‍රියාත්මක වීමට නියමිතය.
ශ්‍රී ලංකා ගුවන් හමුදාවට සිය සාමාජිකයන් වෙනුවෙන් විශේෂිත වූ රෝහලක අවශ්‍යතාවක් දිගු කලක පටන් පැවති අතර මේ නව පියවර හරහා ගුවන් හමුදාවටම සුවිශේෂී වූ රෝහලක් හිමිවීම මෙහි ඇති ප්‍රමුඛතම ජයග්‍රහණයක් බව ඇමැතිවරයා මෙහිදී ප්‍රකාශ කළේය. ජනාධිපතිවරයාගේ මඟපෙන්වීම යටතේ ගත් මේ තීරණය හරහා, ලක්ෂ 50කට ආසන්න ජනගහනයක් වෙසෙන කොළඹ සහ ගම්පහ දිස්ත්‍රික්කවලට, විශේෂයෙන් කඩුවෙල, අතුරුගිරිය සහ අවිස්සාවේල්ල යන ප්‍රදේශවල ජනතාවට පවතින තෘතීයික මට්ටමේ සෞඛ්‍ය සේවා හිඟයට මේ රෝහල විසඳුමක් වනු ඇති බවද ඇමැතිවරයා වැඩිදුරටත් සඳහන් කළේය.
සමරු ඵලකය නිරාවරණය කර රෝහල නිල වශයෙන් විවෘත කිරීමෙන් අනතුරුව, පැමිණ සිටි සම්භාවනීය අමුත්තෝ රෝහල් පරිශ්‍රයේ නිරීක්ෂණ චාරිකාවකද නිරත වූහ.
ආරක්ෂක නියෝජ්‍ය ඇමැති මේජර් ජෙනරාල් (විශ්‍රාමික) අරුණ ජයසේකර, පාර්ලිමේන්තු මන්ත්‍රී අසිත නිරෝෂණ, ආරක්ෂක අමාත්‍යාංශයේ ලේකම් එයාර් වයිස් මාර්ෂල් (විශ්‍රාමික) සම්පත් තුයියකොන්තා, මාර්ෂල් ඔෆ් ද එයාර් ෆෝස් රොෂාන් ගුණතිලක, දිවංගත වෛද්‍ය නෙවිල් ප්‍රනාන්දු මහතාගේ බිරිය ස්වර්ණමාලි ප්‍රනාන්දු ,ගුවන් හමුදා මාණ්ඩලික ප්‍රධානී එයාර් වයිස් මාර්ෂල් ලසිත සුමනවීර මහත්ම මහත්මීන්ද හිටපු ගුවන් හමුදාපතිවරුන්, අධ්‍යක්ෂ මණ්ඩල සාමාජිකයන්, ජ්‍යෙෂ්ඨ නිලධාරීන් සහ රෝහල් කාර්ය මණ්ඩලය ඇතුළු පිරිසක් මේ අවස්ථාවට එක්ව සිටියහ.
