මදුරුවන් බෝ වන ස්ථාන පවත්වාගෙන යන පුද්ගලයන්ට එරෙහිව පවතින දඩ මුදල වැඩි කිරීමේ නීතිමය කටයුතු මේ වන විට ක්‍රියාත්මක වෙමින් පවතින බව ජාතික ඩෙංගු මදුරු මර්දන වැඩසටහනේ ප්‍රජා වෛද්‍ය විශේෂඥ ප්‍රශිලා සමරවීර මහත්මිය පැවසුවාය.
දඩ මුදල් වැඩි කිරීමේ නීති කෙටුම්පත් මේ වන විට නීතිපති දෙපාර්තමේන්තුවට යොමු කර ඇති බවත්, දැනට පවතින දඩ මුදල රුපියල් 5,000ක් වන අතර එම දඩ මුදල සංශෝධනය වී රුපියල් 25,000 සිට 50,000 දක්වා වැඩි වනු ඇති බවත් ඇය ප්‍රකාශ කළාය.
විශේෂ ජාතික ඩෙංගු මදුරු මර්දන සතියක් ඊයේ (09) සිට 14 වැනිදා දක්වා ක්‍රියාවට නංවා ඇති අතර, ඒ සම්බන්ධයෙන් සෞඛ්‍ය අමාත්‍යාංශයේ පැවති මාධ්‍ය දැනුවත් කිරීමේ සාකච්ඡාවට එක්වෙමින් ඒ මහත්මිය ඊයේ (09) මේ බව කියා සිටියාය.
මේ වර්ෂය තුළදී ජාතික මදුරු මර්දන වැඩසටහන් 7ක් පමණ ප්‍රකාශයට පත් කර ක්‍රියාවට නැංවූ බවත්, එම අවස්ථාවන්හිදී පරිශ්‍ර 459,707ක් පරීක්ෂාවට ලක් කළ බවත් ඒ මහත්මිය පැවසුවාය.
එම වැඩසටහන්වලදී නිවාස 394,975ක් පරීක්ෂාවට ලක් කළ අතර, ඩෙංගු මදුරුවන් බෝ වන ස්ථාන සියයට 8ක් ද, පාසල් 1,739කින් සියයට 34ක් ද, ආගමික ස්ථාන 1,917කින් සියයට 21ක් ද, රාජකාරී ආයතන 2,909කින් සියයට 20ක් ද ඩෙංගු මදුරුවන් බෝ කරන ස්ථාන බවට හඳුනාගත් බවද ඒ මහත්මිය ප්‍රකාශ කළාය.