ජනපති අනුර නිසයි ක්‍රිකට් ප්‍රතිසංස්කරණ ටික දැන් වෙන්නේ,ජනාධිපති ඡන්දෙට කලින් අනුර එක්ක මේ ගැනත් අපි කතා කරා – සිදත් වෙත්තමුණි

ක්‍රිකට් ප්‍රතිසංස්කරණ සම්බන්ධයෙන්, සිදත් වෙත්තමුනි මහතා සන්ඩේ අයිලන්ඩ් පුවත්පතට පළකර තිබුණු අදහස්, අද වෙළද පොලට නික-ුත්ව තිබෙන දිවයින පුවත්පත උපුටා දක්වා තිබේ.

දිවයින පුවත්පතේ සම්පූර්ණ පිටුවක් පුරා පළකර තිබෙන එම ලිපියෙන් කොටසක් අපි පහත පලකරන්නෙමු.

මෙම ලපිපියේ සියලු ගෞරව සන්ඩේ අයිලන්ඩ් සහ දිවයින පුවත්පතට හිමි වේ.

යෝජිත නීති සම්පාදනය සම්බන්ධයෙන් ශ්‍රේෂ්ඨාධිකරණය ලබාදුන් තීරණයෙන් පසුව ඔහුගේ සිතේ ප්‍රමුඛව ඇත්තේ සැනසිල්ලකි. පාර්ලිමේන්තු අනුමැතිය ලබාගැනීම සහ නව ව්‍යවස්ථාව ක්‍රියාත්මක කිරීම තවමත් ඉතිරිව තිබුණ ද, දශකයකට වැඩි කාලයක් තිස්සේ ඔහු පෙරමුණ ගෙන කටයුතු කළ අරමුණ දැන් තීරණාත්මක සන්ධිස්ථානයකට පැමිණ තිබේ.

“මට දැනෙන තෘප්තිය වචනවලින් විස්තර කරන්න හරිම අමාරුයි. සිදුවුණු දේ ගැන මම අතිශයින් සතුටු වෙනවා,” වෙත්තමුණි සන්ඩේ අයිලන්ඩ් පුවත්පතට පැවසීය. “ඒ සතුටටත් වඩා මට දැනෙන්නේ ලොකු සැනසීමක්. මොකද ශ්‍රී ලංකාවේ ක්‍රිකට් ක්‍රීඩාව දියුණු වෙන්න නම් මේ වෙනස අනිවාර්යයෙන්ම සිදුවිය යුතුව තිබුණා.”

වෙත්තමුණිට අනුව මෙය හුදෙක් ක්‍රිකට් පාලක මණ්ඩලයේ පුටුවල වාඩි වී සිටින පුද්ගලයන් වෙනස් කිරීමක් නොවේ. විශාල මුදල් සම්භාරයක්, ජාතික ක්‍රිකට් කණ්ඩායම් රැසක් සහ පරම්පරා ගණනාවක ක්‍රිකට් ක්‍රීඩකයන්ගේ බලාපොරොත්තු භාරව සිටින ආයතනයක් පාලනය කළ යුත්තේ කෙසේද යන්න මෙහි මූලික ප්‍රශ්නයයි.

“මේ වෙනස නැතිව නවීන ආයතනයක් පවත්වාගෙන යන්න අවශ්‍ය වගවීම, විනිවිදභාවය සහ වෘත්තීයමය පරිපාලනය අපට ඇති කරගන්න බැහැ. මේ ආයතනය විශාල මුදලක් සහ ක්‍රිකට් ක්‍රීඩාවේ විශාල පරාසයක් පාලනය කරනවා.”

මෙම ගමනේ ආරම්භය 2015 වසර දක්වා දිව යයි. එවකට නව ක්‍රිකට් ව්‍යවස්ථාවක් හඳුන්වාදීමට ගත් උත්සාහය සැලකිය යුතු ප්‍රගතියක් අත්කර ගත්ත ද, අවසානයේ එය අතරමඟ නතර විය. ජාත්‍යන්තර ක්‍රිකට් කවුන්සිලයේ අනුමැතිය පවා ලබාගෙන තිබියදී එම වැඩපිළිවෙළ අසාර්ථක වූ ආකාරය වෙත්තමුණිට

අදත් මතකය.

“ඔබට මතක ඇති, ජනාධිපති නීතිඥ ප්‍රසන්න ජයවර්ධන මහතා සකස් කළ ව්‍යවස්ථාවක් අපි ඉදිරිපත් කළා. නමුත් මොකක් හරි හේතුවක් නිසා ඒ වැඩේ කඩාකප්පල් වුණා.”

කාලයත් සමඟ එදා ඇතිවූ කලකිරීම පහව ගොස් තිබේ. ප්‍රමාදය නිසා විශාල කාලයක් අහිමි වුවද, අවසානයේ වඩාත් ශක්තිමත් ව්‍යවස්ථාවක් සකස් කරගැනීමට හැකිවූ බව ඔහුගේ අදහසයි.

“දැන් ආපසු හැරිලා බලද්දී මට හිතෙනවා එදා ඒක සිදු නොවුණු එක හොඳයි කියලා. මොකද දැන් තිබෙන ව්‍යවස්ථාව ඊට වඩා බොහෝ ඉදිරියෙන් තිබෙන එකක්. එය නවීනයි. ලෝකයේ අනෙකුත් රටවල ක්‍රියාත්මක වන නව ව්‍යවස්ථාවලට අනුකූලයි.”

විශේෂයෙන්ම ස්වාධීන අධ්‍යක්ෂවරුන් පත්කිරීමේ ක්‍රමවේදය සම්බන්ධයෙන් ඔහු දකුණු අප්‍රිකාව සහ නවසීලන්තය උදාහරණයට ගනී.

“අපේ කලින් ව්‍යවස්ථාවේ ස්වාධීන අධ්‍යක්ෂවරුන් හිටියේ නැහැ. නමුත් දැන් ලෝකයේ ක්‍රිකට් පාලක මණ්ඩල බොහොමයක ඒ ක්‍රමය තිබෙනවා. ඒ නිසා එදා අපට ඒ අවස්ථාව මඟහැරුණු එක ගැන දැන් මම සතුටු වෙනවා. මොකද අද අපට වඩා හොඳ දෙයක් ලැබී තිබෙනවා.”

එදා ලැබුණු අවස්ථාව අහිමි වූ අයෙකුගෙන් මෙවැනි අදහසක් පළවීම විශේෂත්වයකි. එහෙත් අතීතයේ වැරදිවලට වගකිවයුත්තන් සොයමින් කාලය ගත කිරීමට වෙත්තමුණි සූදානම් නැත.

“එදා අගමැති රනිල් වික්‍රමසිංහ මහතා මේකට සහයෝගය දුන්නත්, මේ වැඩේ කරගෙන යන්න අවශ්‍ය දේශපාලන අධිෂ්ඨානය තිබුණේ නැහැ. ඇත්තටම කියනවා නම් ඒක නොවුණේ ඇයි කියලා මම දන්නේ නැහැ. නමුත් මම ඒ ගැන කතා කරන්න කැමති නැහැ. ඇයි අපි අතීතය ගැන හිතන්නේ?

අපි අනාගතය දිහා බලමු.”

වත්මන් ව්‍යවස්ථාව සඳහා මූලික පදනම සැපයූයේ හිටපු ක්‍රීඩා අමාත්‍ය රොෂාන් රණසිංහ මහතාගේ සමයේ පත්කළ විනිසුරු චිත්‍රසිරි මහතාගේ ප්‍රධානත්වයෙන් යුත් කමිටුව බව වෙත්තමුණි පෙන්වා දෙයි. හර්ෂ අමරසේකර, අරිත වික්‍රමනායක සහ දුමින්ද හුලංගමුව එම කමිටුවේ සෙසු සාමාජිකයෝ වූහ.

“ඒ අය කළ සේවය වෙනුවෙන් අපි සදාකාලිකවම කෘතඥ විය යුතුයි. මොකද අද ඉදිරිපත් කර තිබෙන ව්‍යවස්ථාව ඇත්තටම පදනම් වී තිබෙන්නේ ඔවුන් කළ වැඩකටයුතු මතයි.”

එමෙන්ම නඩු පෙත්සම් ගණනාවක් පුරා කිසිදු ගාස්තුවක් අය නොකර නීතිමය සහාය ලබාදුන් ජනාධිපති නීතිඥ සංජීව ජයවර්ධන මහතාට ද ඔහු විශේෂ ස්තුතිය පළ කරයි. ඉන් අනතුරුව සිදුවූ ක්‍රියාවලියට දේශීය නීති විශේෂඥයන්, නීතිපති දෙපාර්තමේන්තුව සහ ජාත්‍යන්තර ක්‍රිකට් කවුන්සිලයේ හිටපු නීති අංශ ප්‍රධානී ඩේවිඩ් බෙකර්ගේ උපදෙස් ද එක්විය.

මහේන්ද්‍ර මාපගුණරත්න මහතාගේ මැදිහත්වීමෙන් හඳුන්වා දුන් බෙකර් උපදේශකවරයකු ලෙස සම්බන්ධ කරගත් අතර, ඔහු දින තුනක් නීති කණ්ඩායම සමඟ කටයුතු කළේය. මාපගුණරත්න මහතා ද මෙම ක්‍රියාවලියට සැලකිය යුතු දායකත්වයක් ලබාදී තිබේ.

“නීතිපති දෙපාර්තමේන්තුවෙන් අපට ලැබුණු සහයෝගය අතිවිශිෂ්ටයි. මම හිතන්නේ ක්‍රිකට් ක්‍රීඩාවට තිබෙන ආදරය නිසා තමයි හැමෝම මේ වැඩේ සාර්ථක කරගන්න මහන්සි වුණේ.”

තම කමිටුවේ නීති විශේෂඥයන් වූ දිනල් පිලිප්ස් සහ උපුල් කුමාරප්පෙරුම මෙන්ම ශ්‍රී ලංකා ක්‍රිකට් ආයතනයේ නීතිඥ චාලක සහ ප්‍රකාශ් ෂාෆ්ටර් ද මෙම ක්‍රියාවලිය සාර්ථක

කරගැනීමට නොපසුබටව කටයුතු කළ බව වෙත්තමුණි සිහිපත් කරයි. කෙසේ වෙතත් ඔහුගේ ඉහළම ප්‍රශංසාව හිමිවන්නේ ජනාධිපති අනුර කුමාර දිසානායක මහතාටය. මෙම ප්‍රතිසංස්කරණ යථාර්ථයක් බවට පත්වීමට ජනාධිපතිවරයාගේ සහාය තීරණාත්මක වූ බව ඔහු අවධාරණය කරයි.

අනුර කුමාර දිසානායක මහතා විපක්ෂයේ සිටියදීම ක්‍රිකට් ව්‍යවස්ථා ප්‍රතිසංස්කරණයට සහාය පළ කළ බවත්, එය පක්ෂ දේශපාලනයෙන් ඔබ්බට ගිය ජාතික අවශ්‍යතාවක් ලෙස සැලකූ බවත් වෙත්තමුණි පවසයි.

“ජනාධිපතිතුමා මට කිව්වා, ‘දේශපාලනය අමතක කරන්න. ක්‍රිකට් ක්‍රීඩාවේ යහපත වෙනුවෙන් මේ ප්‍රතිසංස්කරණ අනිවාර්යයෙන්ම ගෙන ආ යුතුයි’ කියලා.”

“ඇත්තටම ජනාධිපතිවරණයට සති කිහිපයකට කලින් එතුමා මට දුරකථන ඇමතුමක් දුන්නා. මේ ප්‍රතිසංස්කරණ සිදුවිය යුතුම බවත්, මැතිවරණයේ ප්‍රතිඵලය කුමක් වුණත් ඒ සඳහා තමන්ගේ සහාය ලබාදෙන බවත් එතුමා කිව්වා.”

යෝජිත ප්‍රතිසංස්කරණවලට එරෙහි විරෝධය උත්සන්න වූ අවස්ථාවේදී ජනාධිපතිවරයාගේ එම ස්ථාවරය අතිශයින් වැදගත් වූ බව වෙත්තමුණිගේ අදහසයි.

“මාව විශ්වාස කරන්න. මේකට තිබුණු විරෝධය හිතාගන්නවත් බැරි තරම් විශාලයි. හැම පැත්තකින්ම විරෝධතා ආවා.”

“නමුත් ජනාධිපතිතුමා නොසැලී සිටියා. මේ වැඩේ කරනවාමයි කියන ස්ථාවරයේ එතුමා හිටියා. ඒ වගේම වැඩේ කරගෙන යන්න අවශ්‍ය නිදහසත් සහයෝගයත් ලබාදුන්නා. ඒ නිසා තමයි මේක සාර්ථක වුණේ.”

ක්‍රීඩා අමාත්‍ය සුනිල් ගමගේ මහතාද ජනාධිපතිවරයාට ඉතා හොඳ සහයෝගයක් ලබාදුන් බව වෙත්තමුණි සඳහන් කරයි. එම දේශපාලන සහාය නොතිබුණේ නම් විවිධ බලපෑම් හමුවේ මෙම වැඩපිළිවෙළ බිඳවැටීමට ඉඩ තිබූ බව ඔහු විශ්වාස කරයි.

Leave a Reply

Your email address will not be published. Required fields are marked *