ලගොඩඅත්තේ ඥානසාර හිමියන්ට ජනාධිපති සමාව ලබාදී නිදහස් නොකළහොත් සියලු රාජ්‍ය උත්සව වර්ජනය කරන බව බලංගොඩ කස්සප හිමියෝ පවසති.
ඥානසාර හිමියන් නිදහස් කරගැනීම සඳහා තමන් වහන්සේලා අඛණ්ඩ අරගලයක නිරත වන බවත්, උන්වහන්සේ නිදහස් කරගන්නා තුරු එම අරගලය අත්නොහරින බවත් බලංගොඩ කස්සප හිමියෝ ප්‍රකාශ කළහ.
තමන් වහන්සේලා කොළඹ ප්‍රදේශයේ වැඩවාසය කරන බව සඳහන් කළ උන්වහන්සේ, ඥානසාර හිමියන් නිදහස් කරගැනීමේ අරමුණින් මෙම ස්ථානයට වැඩම කළ බව ද පැවසූහ.
“යම් කෙනෙක් හිතනවා නම් ඥානසාර හාමුදුරුවෝ නිදහස් කරගන්නේ නැතුව අපි වැඩම කරයි කියලා නැහැ. අපි ඥානසාර හාමුදුරුවෝ නිදහස් කරගන්න තමයි මේ ස්ථානයට වැඩම කළේ” යැයි උන්වහන්සේ සඳහන් කළහ.
එමෙන්ම, තමන් වහන්සේලාට විවිධ ආකාරයේ දුරකථන ඇමතුම් ලැබෙන බවත්, එම ඇමතුම් මඟින් අසභ්‍ය වචන භාවිත කරමින් අපහාස කරන බවත් බලංගොඩ කස්සප හිමියෝ චෝදනා කළහ.
රාජ්‍ය මාධ්‍ය යොදාගනිමින් භික්ෂූන් වහන්සේලාට අපහාස කරන බවටත්, සංඝභේදයට තුඩුදෙන ආකාරයෙන් කටයුතු කරන බවටත් චෝදනා කළ උන්වහන්සේ, ඥානසාර හිමියන්ට සමාව ලබාදීම ජනාධිපතිවරයාගේ ව්‍යවස්ථාපිත වගකීමක් බව ද ප්‍රකාශ කළහ.
“ඥානසාර හාමුදුරුවෝ දෙන්න ඕනේ ජනාධිපතිතුමා, ව්‍යවස්ථාපිත වගකීම ඉෂ්ට කරන්න කියලයි අපි කියන්නේ” යැයි උන්වහන්සේ පැවසූහ.
ඥානසාර හිමියන්ට සමාව ලබාදී නිදහස් නොකළහොත් සියලු රාජ්‍ය උත්සව වර්ජනය කරන බව අවධාරණය කළ බලංගොඩ කස්සප හිමියෝ, එම ඉල්ලීම ඉටුකරන තුරු අඛණ්ඩව විරෝධතා ක්‍රියාමාර්ගවල නිරත වන බව ද සඳහන් කළහ.
මේ අතර, ඥානසාර හිමියන් නිදහස් කරගැනීමේ අරගලය වෙනුවෙන් ආගමික වැඩසටහන් මාලාවක් ක්‍රියාත්මක කිරීමට ද බලාපොරොත්තු වන බව උන්වහන්සේ පැවසූහ.
ඒ අනුව, කඨින චීවර සකස් කිරීම, භික්ෂූන් වහන්සේලා ලවා පිරිත් සජ්ඣායනා කිරීම, පිරිත් පැන් සහ පිරිත් නූල් සකස් කිරීම මෙන්ම චීවර පඬු පෙවීම ඇතුළු කටයුතු සිදුකිරීමට සැලසුම් කර ඇති බව උන්වහන්සේ සඳහන් කළහ. එම ස්ථානයේදී විශේෂ දානමය පින්කමක් පැවැත්වීමට ද අදහස් කර ඇති බව බලංගොඩ කස්සප හිමියෝ පැවසූහ.
අමාත්‍ය ලාල් කාන්ත මහතා ඥානසාර හිමියන්ට සමාව ලබාදීම සම්බන්ධයෙන් සිදුකළ බව කියන ප්‍රකාශයක් පිළිබඳව ද බලංගොඩ කස්සප හිමියෝ මෙහිදී අදහස් දැක්වූහ.
“අපි කියනවා ලාල් කාන්ත මහත්තයා අපි ගන්නවා, ඥානසාර හාමුදුරුවෝ ඇරගෙන තමයි අපි ගෙදර යන්නේ. ඔබතුමාලා කොහොම හරි හැප්පිලා බලමු කියලා, අපි කියනවා හැප්පිලා බලමු” යැයි උන්වහන්සේ පැවසූහ.
තමන් වහන්සේලා නිරායුධව බුදු දහමේ පණිවිඩය රැගෙන මෙම අරගලය ඉදිරියට ගෙන යන බවත්, ඥානසාර හිමියන් නිදහස් කරගැනීම එහි ප්‍රධාන අරමුණ බවත් උන්වහන්සේ වැඩිදුරටත් ප්‍රකාශ කළහ.
විධායකය ඥානසාර හිමියන්ට සමාව ලබාදීමට අකමැති නම් තමන් වහන්සේලාට ගැටලුව ඇත්තේ විධායකය සමඟ බව ද බලංගොඩ කස්සප හිමියෝ පැවසූහ.
“මොකද අපිට අධිකරණයත් එක්ක ප්‍රශ්නයක් නැහැ, විධායකයත් එක්ක ප්‍රශ්නය තියෙන්නේ. විධායකය කැමති නැත්නම් මහත්තයෝ, විධායකය ඇරගෙන හරි අපි ඥානසාර හාමුදුරුවන්ව එළියට ගෙනවා” යැයි උන්වහන්සේ සඳහන් කළහ.
තමන් වහන්සේලා ආණ්ඩු පෙරළීමේ හෝ ජනාධිපති ධුරය අත්පත් කරගැනීමේ අරමුණින් මෙම ක්‍රියාමාර්ගවල නිරත නොවන බව ද බලංගොඩ කස්සප හිමියෝ පැවසූහ.
“අපි ආණ්ඩු පෙරළන්න ආවේ නැහැ, ජනාධිපතිකම් උදුරගන්න ආවේ නැහැ” යැයි පැවසූ උන්වහන්සේ, අවශ්‍ය වුවහොත් රට පුරා භික්ෂූන් වහන්සේලා ඒකරාශී කිරීමට හැකි බව ද ප්‍රකාශ කළහ.
තවද, විහාරමහාදේවී උද්‍යානයේ තමන් වහන්සේලා රැඳී සිටින බව දැනගත් පසු පහසුකම් සැපයීම සම්බන්ධයෙන් ද උන්වහන්සේ අදහස් දැක්වූහ. කතෝලික සහ මුස්ලිම් ජනතාවගෙන් ද තමන් වහන්සේලාට සහාය ලැබෙන බව පැවසූ බලංගොඩ කස්සප හිමියෝ, ඥානසාර හිමියන් නිදහස් කරගැනීම සඳහා ගෙන යන අරගලය දිගින් දිගටම ක්‍රියාත්මක කරන බව අවධාරණය කළහ.
ඥානසාර හිමියන්ට සමාව ලබාදී නිදහස් කරන ලෙස ජනාධිපතිවරයාගෙන් ඉල්ලා සිටි බලංගොඩ කස්සප හිමියෝ, එම ඉල්ලීම ඉටුකරන තුරු තමන් වහන්සේලාගේ අරගලය අඛණ්ඩව ඉදිරියට ගෙන යන බව වැඩිදුරටත් පැවසූහ